फेसबुक पर…

होत का है का बताई ? फेसबुक पर
मित्र बनिगे बाप भाई फेसबुक पर

एकु संघी एकु कट्टर काँगरेसी
राति सारी भै लड़ाई फेसबुक पर

बाप माई बैठि के खीसै बनावैं
कै लिहिसि बिटिया सगाई फेसबुक पर

जब बहिन राखी मेसेन्जर पर पठाइस
आइगै फौरन कलाई फेसबुक पर

एकु मनई पुण्यतिथि की पोस्ट डारिसि
दै रहे उल्लू बधाई फेसबुक पर

हुइ रहे इस्कूल से गायब पढ़ैया
कै रहे सारी पढ़ाई फेसबुक पर

बाप की अरथी उठइहैं गाँव वाले
लरिकवा लाइव चलाई फेसबुक पर

बिन बताये बंद कइ दी सब कहानी
जिव कहत है फिर न आई फेसबुक पर

ज्ञान प्रकाश आकुल

Facebook
Twitter
YouTube
LinkedIn